الجديد برس
انتو داريين ان الجاهل “الطفل” الذي ولد في اول يوم للعدوان قد دخل “المدرسة” والتحالف ماقد دخل صنعاء …!؟
–
وعيكمل اول وثاني وثالث ورابع وخامس وسادس و يمتسخ ويهرب من المدرسة و”يدخل” عالم الطيرفة
والتحالف ماقد دخل صنعاء …؟!
ويتعلم الشقارة والتخازين والسمرات ويسرق ذهب أمه و”يدخل” الاحتياطي والتحالف ماقد دخل صنعاء …؟!
ويتربى ويتوب ويسامحوه ويذاكر ويدي 85 ٪
و”يدخل” هندسة حاسوب مقصده انه عيقع ساع بيل غيتس والتحالف ماقد دخل صنعاء …؟!
وينصدم بالواقع ويرجم الشهادة ويكتئب و”يدخل” في عزلة والتحالف ماقد دخل صنعاء …؟!
ويلعن الحظ العاثر والبلاد الذي ماقدرت عبقريته و يجابر روحه العشي و “يدخل” في حالة نفسية والتحالف ماقد دخل صنعاء …؟!
ويعالجوه ويلطموه ويقروا عليه ياسين والمعوذات وتبارك
ويدخل “المصحة” والتحالف ماقد دخل صنعاء …!
ويقصفوا المصحة ويموتوا المجانين كلهم
إلا هو عيدخل في غيبوبة والتحالف ماقد دخل صنعاء …!
ويرفع عنه الغطاء ويجو الملايكة يعقلوه ويدخلوه العالم الأخر والتحالف ماقد دخل صنعاء …!
وبعد سنتين يصحى ويحكي تجربته للناس ويشتهر ويألفوا عنه كتب ويفعلوا له افلام ويدخل التاريخ والتحالف ماقد دخل صنعاء …!
ويدخل في مشاكل ويدخل في شريعة ويدخل ويدخل ويمكنها دخلات لوما يدخل موسوعة غينيس !!
–
والتحالف ؟!!
–
ماقد دخل صنعاء
مالك المداني – كاتب يمني ساخر
